منقبت حُسین (علیہ سلام)

حُسین (علیہ سلام) مہرو وفا کا پیکر
حُسین (علیہ سلام) راجہ ،حُسین (علیہ سلام) شنکر
حُسین (علیہ سلام) طاہر ،حُسین (علیہ سلام) اطہر
حُسین (علیہ سلام) علم ویقین کا لشکر
حُسین (علیہ سلام) سے رمزِدِل ملی ہے
ولی کا بیٹا ہے خود ولی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حُسین (علیہ سلام) رہبر ،حُسین (علیہ سلام) ھادی
کہ جس نے ایمان کو جِلا دی
دلوں میں اک جوت سی جگا دی
یزیدیت کی کمر جُھکا دی
کبھی نہ باطل سے خوف کھایا
وہ زیرِ خنجر بھی مُسکرایا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حُسین (علیہ سلام) کی راہ خُدا کی راہ ہے
حُسین (علیہ سلام) دُنیا کا شہنشاہ ہے
نبیٌ کی آغوش میں پلا ہے
وہ شیر دل ہے منچلا ہے
شہیدِاعظم ہے نام اُس کا
فلک سے اُونچا مقام اُس کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حُسین (علیہ سلام) سچ کاسجل سویرا
حُسین (علیہ سلام) آکاش کا پھریرا
حُسین (علیہ سلام) کا قلب میں بسیرا
حُسین (علیہ سلام) تیرا حُسینً میرا
حُسین (علیہ سلام) محبوب اپنے رب کا
حُسین (علیہ سلام) سارے جہاں کا سب کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حُسین (علیہ سلام) ایثار کا مجسمہ
حُسین (علیہ سلام) افکار کا مجسمہ
نبیٌ کے انوار کا مجسمہ
علی (علیہ سلام) کے اطوار کا مجسمہ
وہ دُر کے جس کا نبیٌ صدف ہے
بشر کو جس سے مِلا شرف ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حُسین (علیہ سلام) گُلشن کی رنگ و بُو ہے
حُسین (علیہ سلام) کا شفق میں لہو ہے
حُسین (علیہ سلام) کعبے کی آرزو ہے
 حُسین (علیہ سلام) کی سب کو جستجو ہے
حُسین (علیہ سلام) پہ سچ کا خاتمہ ہے
حُسین (علیہ سلام) دھرتی کی آتما ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حُسین (علیہ سلام) جو دوسخا کا مرکز
حُسین (علیہ سلام) لُطف وعطا کا مرکز
حُسین (علیہ سلام) مہرو وفا کا مرکز
حُسین (علیہ سلام) صدق و صفا کا مرکز
اُسی سے سورج کو ضَو ملی ہے
اُسی سے تاروں میں روشنی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حُسین (علیہ سلام) عالم کا تاج ور ہے
وہ کنزِ مخفی سے با خبر ہے
رموزِ اُلفت سے بہرہ ور ہے
کہ اُس کہ دل میں خُدا کا گھر ہے
کہ موت بھی اُس کو زندگی ہے
اُسی کے سجدے سے بندگی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دلوں پہ قائم ہے  راج اُس کا
کروڑوں آنسو خراج اُس کا
حقیقتیں ہیں رواج اُس کا
خُدا پرستی مزاج اُس کا
ہزاروں زخموں سے پاش تن ہے
وہ گرم ریتی پہ سجدا زن ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تمام گیتی سُبو ہے اُس کا
یہ عالمِ رنگو بُو ہے اُس کا
ہر اک شجر میں نمو ہے اُس کا
شفا کا موجب لہو ہے اُس کا
وہ عرش سے بھی بلند تر ہے
جہاں پہ مولاً تیری قبر ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ آشتی کا پیامبر ہے
وہ راستی کا نشان گر ہے
صداقتوں کے لیے سپِر ہے
دعائے بِرہیمً کا ثمر ہے
محافظِ دینِ مُصطفیٰ ٌ ہے
وہ اِس سفینے کا ناخُدا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہو ظُلم جتنا دراز اُس پر
ختم ہے عجزونیازاُس پر
سب انبیاء کو ہے ناز اُس پر
فخر کناں ہے نماز اُس پر
کہ اب جو دُنیا میں ہیں نمازی
اُسی کی ہے ساری کارسازی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اُسی سے صدق و صفا ہے باقی
اُسی سے رسِم وفا ہے باقی
اُسی سے ذکرِ خُدا ہے باقی
یہ دین کا تذکرہ ہے باقی
اگر یہ نُورِ فلک نہ ہوتا
تو دین کا نام تک نہ ہوتا

غلام عابد خان مختار